ആദ്യമായി രാഷ്ട്രത്തലവന്മാർ പള്ളിയിൽ ഹാജരാകും. ഉലമാക്കലും സൂഫികളും സന്നിഹിതരായിരിക്കും. പിന്നീട് സുൽത്താൻ തന്റെ രാജകീയമായ പരേഡിലൂടെ കുതിരപ്പുറത്ത് സ്ഥലത്തെത്തും. പള്ളിയിൽ പ്രവേശിച്ച ശേഷം നബിദിനത്തെ സംബന്ധിച്ച് ഇമാമിന്റെ ഒരു പ്രസംഗം നടക്കും. പിന്നീട് ഖുർആനും മൗലിദും 'ദലാഇലുൽഖൈറാത്തും' പാരായണം ചെയ്യപ്പെടും.
മൗലിദാഘോഷം വളരെ വിപുലമായി കൊണ്ടാടപ്പെട്ടിരുന്നു. പൊതുജനങ്ങൾ തടിച്ചുകൂടിയിരുന്നു. പുറത്തു നിന്ന് വരുന്ന വിദേശിപ്രതിനിധികളെയും ആഘോഷങ്ങളിലേക്ക് ക്ഷണിക്കാരുണ്ടായിരുന്നു. പ്രവാചകന്റെ ഖിർഖാ ശരീഫ് സന്ദർശനവും ആഘോഷത്തിന്റെ ഭാഗമായിരുന്നു.
ശിക്ഷാകാലാവധിയുടെ മൂന്നിൽ രണ്ട് ഭാഗം അനുഭവിച്ച് കഴിഞ്ഞവർക്ക് ജയിൽ മോചനം നൽകാനും സുൽത്താൻമാർ ഈ ദിവസം തെരഞ്ഞെടുത്തിരുന്നു.
സുലൈമാൻ ചെലേബി (d. 1422) രചിച്ച 'വസീലത്തുന്നജാത്' എന്ന മൗലിദ് ഗ്രന്ഥമാണ് ഉസ്മാനികൾ പാരായണം ചെയ്തിരുന്നത്. സുഗ്രാഹ്യമായ ഓട്ടോമൻ തുർക്കി ഭാഷയിൽ 1409 ൽ വിരചിതമായ ഈ മൗലിദ് സാധാരണക്കാർക്കിടയിലും പെട്ടെന്ന് തന്നെ വ്യാപിച്ചു. പിന്നീട് പല ഭാഷകളിലേക്കും വിവർത്തനം ചെയ്യപ്പെടുകയുമുണ്ടായി.